Ministrja në detyrë e Drejtësisë, Albulena Haxhiu ka bërë të ditur se janë gjetur në Prishtinë mbetjet mortore të tre personave të zhdukur gjatë luftës së fundit në Kosovë.

Me anë të një postimi në Facebook, Haxhiu tha se mbetjet mortore janë dërguar në IML për ekzaminim dhe identifikim, përcjell Arbresh.info.

“Pas dy ditëve të operacioneve të gërmimit dhe zhvarrimit në Prishtinë, ekipet mjekoligjore të Institutit të Mjekësisë Ligjore dhe EULEX, me mbështetjen e Departamentit për Hetimin e Krimeve të Luftës në Policinë e Kosovës dhe Komisionit Qeveritar për Personat e Zhdukur, kanë lokalizuar mbetjet mortore të tre personave të zhdukur gjatë luftës së fundit në Kosovë. Mbetjet mortore janë dërguar në Institutin e Mjekësisë Ligjore për ekzaminime të mëtejshme dhe procesin e identifikimit”, ka shkruar Haxhiu.

“Ky rezultat është arritur falë një pune të gjatë dhe të koordinuar analitike nga institucionet përkatëse, si dhe mbështetjes së vazhdueshme të Kryqit të Kuq Ndërkombëtar. Aktivitetet në kuadër të kërkimit të personave të zhdukur do të vazhdojnë në lokacione të tjera gjatë javëve në vijim”, tha Haxhiu./Arbresh.info